Vöruskiptin lakari um 4 milljarða miðað við síðasta ár

Fyrstu þrjá mánuðina ársins voru fluttar út vörur fyrir 136,4 milljarða króna en inn fyrir tæpa 112,0 milljarða króna . Afgangur var því á vöruskiptunum við útlönd sem nam 24,5 milljörðum en á sama tíma árið áður voru þau hagstæð um 28,6 milljarða á sama gengi. Vöruskiptajöfnuðurinn var því 4,1 milljarði króna lakari en á sama tíma árið áður.

Þetta kemur fram á vefsíðu Hagstofunnar. Þar segir að í marsmánuði voru fluttar út vörur fyrir 51,3 milljarða króna og inn fyrir tæpa 45,0 milljarða króna. Vöruskiptin í mars voru því hagstæð um 6,3 milljarða króna. Í mars 2010 voru vöruskiptin hagstæð um 10,8 milljarða króna á sama gengi.

Fyrstu þrjá mánuði ársins 2011 var verðmæti vöruútflutnings 11,5 milljörðum eða 9,2% meira á föstu gengi en á sama tíma árið áður. Sjávarafurðir voru 37,2% alls útflutnings og var verðmæti þeirra 10,1% meira en á sama tíma árið áður.  Útfluttar iðnaðarvörur voru 57,8% alls útflutnings og var verðmæti þeirra 6,9% meira en á sama tíma árið áður. Mest aukning varð í verðmæti útflutnings iðnaðarvara, aðallega áls. Einnig varð aukning í útflutningi sjávarafurða.

Fyrstu þrjá mánuði ársins 2011 var verðmæti vöruinnflutnings 15,5 milljörðum eða 16,1% meira á föstu gengi en á sama tíma árið áður. Aukning varð í innflutningi á hrá- og rekstrarvöru, eldsneyti og fjárfestingarvöru.