Ríkið hefur afskrifað 192 milljarða skuldir fjármálafyrirtækja

Íslenska ríkið hefur í heildina  afskrifað 192 milljarða króna skuldir fjármálafyrirtækja. Þetta kemur fram í svari Steingríms J. Sigfússonar fjármálaráðherra við fyrirspurn Kristjáns Þórs Júlíussonar, þingmanns Sjálfstæðisflokksins.

Kristján Þór spurði hve stór hluti 46 milljarða fjárhagsfyrirgreiðslu sem fyrirtækin VBS og Saga Capital fengu frá ríkissjóði teldist tapaður. Fjármálaráðherra svaraði því ekki í fyrirspurninni en vísaði á Eignasafn Seðlabanka Íslands.

Fjármálaráðherra vill heldur ekki leggja verðmat sex milljarða skuldabréf sem Askar Capital gaf út og Seðlabanki Íslands yfirtók í febrúar 2010, en skuldabréfið er nú í eigu Eignasafns Seðlabanka Íslands.