Páskarnir juku áfengissölu um 22% milli ára í apríl

Í apríl voru seldir 1.583 þúsund lítrar af áfengi sem er tæplega 22% meiri sala en í apríl í fyrra.  Ástæðan er að páskarnir eru annasamur tími í Vínbúðunum en páskarnir voru í mars í fyrra en apríl núna.

Í umfjöllun á vefsíðu Vínbúðanna segir að sala áfengis tímabilið janúar til  apríl  er um 2% minni en sömu mánuði í fyrra.  Samdráttur í ókrydduðu brennivíni og vodka er 11% á meðan aukning er í sölu á rauðvíni, hvítvíni og blönduðum drykkjum.

Mest er aukningin í blönduðum drykkjum milli apríl í ár og apríl í fyrra eða rúmlega 50%. Sala á bjór jókst um rúm 19% á sama tíma en sala á léttvínum jókst um 30 til 35%.