Grunnrannsóknir nánast eingöngu á hendi ríkisins

Um 90% af öllum grunnrannsóknum á Íslandi eru fjármagnaðar af hinu opinbera, annaðhvort í gegnum háskóla, styrki eða aðrar ríkisstofnanir. Þetta kemur fram í nýrri skýrslu alþjóða hugverkasamtakanna.

Með grunnrannsóknum er átt við alls kyns þróunarstarf sem hefur fyrst og fremst þann tilgang að auka við þekkingu, en hefur ekki hagnaðarsjónarmið að leiðarljósi.

Að meðaltali eru þrír fjórðu útgjalda til grunnrannsókna fjármagnaðir af hinu opinbera í efnuðum ríkjum í heiminum. Norska ríkið ver t.d. litlu minna en Íslendingar í grunnrannsóknir, í Bandaríkjunum er hlutfallið nær því að vera 70 prósent og í Bretlandi um 50 prósent.

Í skýrslunni segir að hlutur ríkisins í slíkum rannsóknum sé stöðugt að verða mikilvægari, þar sem einkafyrirtæki einblíni einkum á vöruþróun og séu stöðugt að draga úr útgjöldum til grunnrannsókna.

Þar er enn fremur lögð áhersla á að grunnrannsóknir hins opinbera nýtist einkageiranum, þar sem oft er hægt að hagnýta þær í viðskiptalegum tilgangi þegar fram líða stundir. Ef þeirra nyti ekki við væri hætta á of lítilli fjárfestingu í þekkingarleit.