Simmi og Jói íhuga að kaupa Dominos

„Það eru sennilega allir í veitingabransanum að skoða þetta," segir Sigmar Vilhjálmsson einn af eigendum Hamborgarafabrikkunnar, eða Simmi eins og hann er oftast kallaður, en afþreyingasíðan Menn.is greindi frá því í dag að Simmi og félagi hans Jóhann Ásbjörnsson, oftast kallaður Jói, væru að fara kaupa pítsufyrirtækið Dominos sem Landsbankinn tók yfir á dögunum.

„En við erum klárlega að skoða þetta," segir Simmi og bætir við að þeir félagar, auk Skúla Gunnars Sigfússonar, meðeiganda í Hamborgarafabrikkunni, vera að skoða þann möguleika að bjóða í fyrirtækið. Hann segir það þó af og frá að það sé næsta víst að þeir munin festa kaup á fyrirtækinu eins og segir á Menn.is.

Dominos var í eigu Magnúsar Kristinssonar, útgerðarmanns í Vestmannaeyjum, en hann missti fyrirtækið í hendur Landsbankans vegna gríðarlegrar skuldsetningar félagsins.

Í tilkynningu frá Landsbankanum frá því í mars kom fram að stefnt væri að því að söluferlinu lyki í júní.

Sigmar segir þá félaga ekki búna að bjóða í félagið enda söluferlið ekki hafið formlega að hans sögn. Þá sagði hann ferlið frekar flókið þar sem nýir eigendur þyrftu einnig samþykki alþjóðlegu Dominos-keðjunnar til þess að fá að kaupa fyrirtækið.

Sigmar útlokaði alls ekki þann möguleika að þeir félagar myndu bjóða í fyrirtækið.

Pítsafyrirtækið Dominos skilur eftir sig nærri tveggja milljarða króna skuld samkvæmt ársreikningum fyrir árin 2008 og 2009 og DV greindi frá á sínum tíma.