Atvinnuleysi 8,6% í mars, óbreytt frá fyrri mánuði

Skráð atvinnuleysi í mars síðastliðnum var 8,6% en að meðaltali 13.757 manns voru atvinnulausir í mars og breyttist hlutfallstala atvinnuleysis því ekki frá febrúar.

Þetta kemur fram á vefsíðu Vinnumálastofnunnar. Þar segir að körlum á atvinnuleysisskrá fækkaði um 77 að meðaltali eða um 0,1 prósentustig að meðaltali en konum fjölgaði um 62 að meðaltali. Atvinnulausum fjölgaði um 68 á höfuðborgarsvæðinu og um 14 á Suðurnesjum. Annars staðar fækkaði lítilsháttar á atvinnuleysisskrá.

Atvinnuleysið er 9,2% á höfuðborgarsvæðinu en 7,5% á landsbyggðinni. Mest er það á Suðurnesjum 14,5%, en minnst á Norðurlandi vestra 3,9%. Atvinnuleysið er 9,2% meðal karla og 7,8% meðal kvenna.

Alls voru 14.865 manns atvinnulausir í lok mars. Þeir sem voru atvinnulausir að fullu voru hins vegar 12.425 af þeim voru 4.062 í einhvers konar úrræðum á vegum Vinnumálastofnunar, auk þess sem mikill fjöldi fer í ráðgjafarviðtöl, á kynningarfundi og í vinnumiðlun.

Fækkun atvinnulausra í lok marsmánaðar frá lokum febrúar nam 8 en 62 færri karlar voru á skrá en 54 fleiri konur m.v. febrúarlok. Á landsbyggðinni fækkar um 72 en fjölgar um 64 á höfuðborgarsvæðinu.

Fjöldi þeirra sem hafa verið atvinnulausir lengur en 6 mánuði er nú 8.189 og fjölgar um 527 frá lokum febrúar og er um 55% þeirra sem eru á atvinnuleysisskrá í lok mars. Þeim sem verið hafa atvinnulausir í meira en eitt ár fjölgar úr 4.820 í lok febrúar í 4.837 í lok mars.

Alls voru 2.741 á aldrinum 16-24 ára atvinnulausir í lok mars en 2.722 í lok febrúar eða um 18% allra atvinnulausra í mars og fjölgar um 19 frá því í febrúar. Í mars 2010 var fjöldi atvinnulausra ungmenna 3.147.