Landsbankinn tekur yfir starfsemi SpKef

Sparisjóðurinn í Keflavík verður að öllum líkindum sameinaður Landsbankanum en viðræður eru langt komnar. Stjórnarmenn í sparisjóðnum voru ekki hafðir með í ráðum og lásu fyrst um þetta í fjölmiðlum. Þeir búast við að þetta verði jafnvel klárað um helgina.

Unnið er að því innan Bankasýslu ríkisins að renna SpKef, þ.e Sparisjóðnum í Keflavík, inn í Landsbankann, en Bankasýslan heldur á hlutum ríkisins í báðum fyrirtækjunum.

Þetta þýðir þó ekki að ríkissjóður komist hjá því að leggja 14-15 milljarða króna inn í SpKef til að mæta skuldbindingum vegna innistæðna, en heildarskuldbindingar vegna innistæðna nema alls átján milljörðum króna. Samkvæmt upplýsingum fréttastofu eru viðræður um sameiningu SpKef og Landsbankans langt komnar. Svo virðist stjórn SpKef hafi ekki verið höfð með í ráðum því stjórnarmenn sem fréttastofa ræddi við í dag sögðust fyrst hafa lesið um málið í fjölmiðlum og er nokkur gremja vegna málsins innan stjórnarinnar. Samkvæmt heimildum fréttastofu eru þessar hugmyndir um sameiningu komnar frá Árna Páli Árnasyni, efnahags- og viðskiptaráðherra, en Árni Páll hefur ekki svarað skilaboðum fréttastofu í dag. Stjórnarmenn hjá SpKef sem fréttastofa ræddi við sögðust jafnvel búast við að áform um sameiningu verði kynnt á mánudag.

Eftir því sem fréttastofa kemst næst verða þau útibú SpKef sem rekin verða áfram rekin undir merkjum Landsbankans ef sameiningin verður að veruleika.

Nokkur umræða hefur verið að undanförnu um stærð bankakerfisins og nauðsyn frekari sameiningar til að ná fram hagræðingu. SpKef rekur í dag sextán útibú á landinu en þar af eru fimm í Reykjanesbæ.