Kadeco semur um lokun og frágang við Stafnes

Kadeco hefur samið við Vélaleigu A.Þ. (A.Þ.) um að taka að sér lokun og frágang á aflögðum urðunarstað við Stafnes í Sandgerðisbæ. A.Þ. mun loka tveimur haugum, reisa varnargarð til að varna því að sjór nái til hauganna og fjarlægja rusl og snyrta umhverfi aflagðrar fjarskiptamiðstöðvar.

Í tilkynningu segir að samningurinn var gerður í kjölfar útboðs Kadeco þar sem þrettán aðilar buðu í verkið. Tilboð A.Þ. verktaka ehf hljóðaði upp á alls 95 milljónir kr.  Eftirlit með verkinu verður í höndum Verkfræðistofu Suðurnesja.

Hluti starfsemi bandaríkjahers fór fram á Stafnesi. Að loknum framkvæmdum verður búið að hreinsa ummerki um starfsemi hans. Af hálfu Sandgerðisbæjar eru í mótun hugmyndir sem snúa að framtíðarnotkun og skipulagi svæðisins með tilliti til ferðamála og útivistarmöguleika.

„Frágangur við Stafnes er hluti af því verkefni Kadeco að ganga vel frá atvinnusvæðum bandaríkjahers og er þetta með stærri verkefnum Kadeco í ár. Nú þegar hafa verið unnir fjölmargir áfangar er lúta að hreinsun svæða og má segja að með þessu verkefni sér búið að vinna stærsta hlutann af þeim,“ segir Kjartan Þór Eiríksson, framkvæmdarstjóri Kadeco.

„Við erum mjög spennt fyrir þessum framkvæmdum þar sem Stafnes verður nú í góðu samræmi við nærumhverfi sitt. Sandgerðisbær er í dag að móta stefnu um framtíðarnýtingu Stafnes með tilliti til útivistar og möguleika í ferðaþjónustu og sjáum við mikil tækifæri í svæðinu. Með endurheimtu þess og malbikun Ósabotnavegar opnast hringleið að mikilli náttúrufegurð og sögulegum stöðum svo sem Þórshöfn,  Básendum, Stafnesi og Hvalsnesi,“ segir Sigrún Árnadóttir, bæjarstjóri Sandgerðisbæjar.