Össur notar nýtt lán til að greiða upp lán hjá Arion banka

Össur hf. mun nota fé frá nýjum lánasamningi sínum við þrjá alþjóðlega  banka til að greiða upp lán sín gagnvart Arion banka. Reikna má með að árlegur vaxtasparnaður Össurar muni nema um 2 milljónum dollara eða um 232 milljónum kr.

Þetta kemur fram í Morgunkorni greiningar Íslandsbanka. Þar er fjallað um að Össur undirritaði í dag 5 ára lánasamning við þrjá alþjóðlega banka, ING Bank, Nordea og SEB upp á 231 milljónir dollara. Lánið skiptist í 120 milljón dollara lán með jöfnum afborgunum og 111 milljón dollara lánalínu fyrir rekstur og möguleg fyrirtækjakaup. Lánin eru með 145 punkta álagi á LIBOR/EURIBOR en núverandi lán félagsins eru að meðaltali með um 300 punkta álagi.

Lánasamningurinn mun því lækka vaxtakostnað félagsins miðað við núverandi skuldahlutföll. Áætla má að árlegur vaxtasparnaður gæti numið um 2 milljónum dollara en nettó vaxtaberandi skuldir félagins námu um 133 milljónir dollara um síðustu áramót.

Kjörin í þessum lánasamningi verða að teljast góð og með þessari endurfjármögnun hefur Össur tryggt sér alþjóðlegan aðgang að lánsfé sem er mjög mikilvægt fyrir samkeppnishæfni og vaxtarmöguleika félagins. Samhliða þessu mun Össur greiða upp lán sín gagnvart Arion banka, að því er segir í Morgunkorninu.