Landsmótið gríðarleg innspýting

„Þetta verður gríðarleg innspýting í hið skagfirska hagkerfi,“ segir ferðamálafulltrúi Skagafjarðar en þar er nú verið að undirbúa eitt stærsta mannamót landsins þetta árið - Landsmót hestamanna - sem varð að slá af í fyrra vegna hrossapestarinnar.

Þegar fréttastofa renndi inn á Vindheimamela þar sem þúsundir aðdáenda íslenska hestsins og glæsilegustu hross landsins munu fylla grundir eftir átta daga voru menn að snurfusa, sópa burtu ryki, vinna við raflagnir og undirbúa þetta vikulanga mót manna og hesta.

Það var áfall fyrir Skagafjörð þegar aflýsa þurfti landsmótinu síðasta sumar eftir að íslensk hross veiktust hvert á fætur öðru af hestapestinni. Búist hafði verið við allt að tólf þúsund gestum, fjölda útlendinga, ferðaþjónustan talaði um hundruð milljóna króna tap, aðrir um milljarða gjaldeyristap. Óvíst er að hægt verði að vinna upp tapið með mótinu í ár.

„Það auðvitað er alveg viðbúið að það verði eitthvað færri erlendir gestir en hefðu getað orðið í fyrra en það  er enginn bilbugur á mönnum að halda þetta mót eins glæsilegt og það mögulega getur orðið,“ segir Áskell Heiðar Ásgeirsson, ferðamálafulltrúi Skagafjarðar.

Þegar fréttstofa kom við á Vindheimamelum var allt með kyrrum kjörum. Spurður hvort allt verði gert á síðustu stundu svarar Áskell: „Þetta gengur allt saman upp. Það eru vanir menn í verkunum.“

Hann segir kröfurnar aukast með hverju móti, nú þurfi nýjan ljósleiðara, nýjan rafmagnsstreng.