Segir Kroll hafa beinlínis hótað starfsfólki Glitnis

Málshöfðunin fyrir dómstólnum í New York sýnir að mati Pálma Haraldssonar, fyrrverandi eiganda Fons ehf., óskiljanlegt offors, sem einkennir starfshætti slitastjórnar og skilanefndar Glitnis banka.

Þetta kemur fram í greina gerð Pálma vegna tveggja dómsmála sem Glitnir hefur höfðað á hendur honum og sex annarra. Þar segir hann ennfremur að starfsmenn Glitnis hafi þurft að þola beinar hótanir af hálfu rannsóknarfyrirtækisins Kroll.

Í greinagerðinni, sem hann sendi fjölmiðlum í kvöld, kemur fram hörð gagnrýni á skilanefnd og slitastjórn Glitnis. Meðal annars gerir Pálmi alvarlegar athugasemdir við að höfðað hafi verið mál gegn honum bæði á Íslandi og í Bandaríkjunum.

Svo segir hann í málsvörn sinni:

„Þessi fyrirbæri starfa án eiginlegs umboðs kröfuhafa bankans, sem þó eiga alla hagsmuni af rekstri Glitnis. Glitnir hefur flest einkenni þrotabús, þótt meðferðin sé kennd við ,,slit". Ákvarðanir um 6 málssóknirnar voru ekki bornar undir kröfuhafana, en ljóst má vera að kostnaðurinn við þær er gríðarlegur."

Þá vekur athygli að í greinagerðinni er rannsóknarfyrirtækið Kroll sakað um að hafa hótað starfsmönnum Glitnis beint í umdeildum yfirheyrslum innan bankans.

Orðrétt segir í greinagerðinni:

„Stefnandi [Glitnir] mun hafa samið við alþjóðlegt einkarannsóknarfyrirtæki, Kroll að nafni, um að það framkvæmdi rannsóknir á bankanum. Þetta fyrirtæki hefur skipulagt yfirheyrslur yfir núverandi og fyrrum starfsmönnum Glitnis í þar til gerðu yfirheyrsluherbergi, sem að mati umbjóðanda míns eru andstæðar lögum.

Pálmi hefur haft spurnir af yfirheyrsluaðferðum, sem hafa falist í kröfum um að starfsmenn breyttu framburði sínum ef þeir uppfylltu ekki væntingar þeirra sem spurðu. Starfsmenn hafi setið undir beinum hótunum."

Hægt er að lesa greinagerðina í heild hér fyrir neðan.