Norrænir ráðherrar rífast um Icesave

Norðmenn hafa nú látið alfarið af kröfunni um lausn Icesave deilunnar sem skilyrði fyrir fjárhagsaðstoð þeirra. Jonas Gahr Störe utanríkisráðherra Noregs tók af allan vafa um það á blaðamannafundi í Kaupmannahöfn í gærdag.

„Það eru engin bein tengsl milli áframhaldandi áætlunar AGS og Icesave," hefur Reuters eftir Jonas Gahr Störe á fundinum sem haldinn var í tengslum við fund norrænu utanríkisráðherranna í borginni.

"Svo lengi sem skilyrði AGS eru uppfyllt mun Noregur ekki segja nei á fundum hjá AGS," segir Störe í samtali við NTB fréttastofuna

Störe segir að staðan sem komin sé upp er ekki sú besta. Í umfjöllun um málið á vefsíðunni e24.no segir að Störe hafi þá skoðun að öll Norðurlöndin ættu að fara að fordæmi Noregs og skilja í sundur Icesave deiluna og neyðaraðstoðina.

Svíar standa fast á því að Icesave deilan verði leyst áður en sænska fjárhagsaðstoðin verður reidd af hendi. Fréttir að undanförnu benda til að Finnar muni fylgja Svíum að málum. Anders Borg fjármálaráðherra Svía hefur verið harður á því að leysa verði Icesave deiluna fyrst og hefur hlotið skammir frá Össuri Skarphéðinssyni utanríkisráðherra fyrir.

Danir eru síðan mitt á milli í deilunni en á vefsíðu stjórnarráðisins er greint frá fundi Össurar með Lene Espersen utanríksráðherra Danmerkur þar sem Icesave var til umræðu. „Lene Espersen lýsti yfir ríkum skilningi á sjónarmiðum Íslands og sagði að hún vonaðist eftir samkomulagi í málinu sem fyrst," segir á vefsíðunni.