KR-ingar unnu baráttusigur í Hólminum og tryggðu sér oddaleik

KR-ingar tryggðu sér í kvöld oddaleik á móti Snæfelli í baráttu liðanna um sæti í lokaúrslitunum í Iceland Express deild karla eftir fjögurra stiga sigur, 72-76, eftir ótrúlega stöðu- og varnarbaráttu tveggja öflugra liða í Stykkishólmi.

Morgan Lewis kórónaði frábæran leik sinn með því að verja skot Sean Burton á glæsilegan hátt 9 sekúndum fyrir leikslok og hitti síðan úr tveimur vítum sem hann fékk í kjölfarið. Morgan klikkaði reyndar á öðrum tveimur vítum en Fannar Ólafsson tryggði sínum mönnum sigurinn með síðustu körfu leiksins.

Snæfellingar voru ískaldir í upphafi, klikkuðu á níu fyrstu skotum sínum í leiknum og KR-liðið komst í 7-0 í upphafi leiks. Fyrsta karfa Snæfells kom ekki fyrr en eftir rúmar fimm mínútur og KR var komið mest níu stigum yfir, 14-5, í fyrsta leikhlutanum. Snæfell bætti hinsvegar sinn leik og náði að minnka muninn í fjögur stig, 12-16, fyrir lok hans.

Snæfell byrjaði annan leikhlutann af krafti, tók frumkvæðið í leiknum og náði í kjölfarið mest fimm stiga forskot, 25-20. Snæfell var síðan 33-30 yfir í hálfleik.

Pavel Ermolinskij byrjaði seinni hálfleikinn mjög vel fyrir KR og skoraði 7 stig á fyrstu fjórum mínútunum og síðasta karfan kom muninum niður í eitt stig. 40-39. Ingi Þór Steinþórsson, þjálfari Snæfells, tók þá leikhlé og hans menn nánast lokuðu vörninni næstu mínútur, komust í 49-41 og voru síðan 55-51 yfir fyrir lokaleikhlutann.

KR-ingar voru ekkert á því að gefast upp þótt ekkert gengi í skotunum fyrir utan. Morgan Lewis skoraði langþráða þriggja stiga körfu sem minnkaði muninn í 60-58 og Pavel Ermolinskij náði síðan að jafna leikinn og koma KR yfir, 62-64, í fyrsta sinn síðan í öðrum leikhluta með því að skora fjögur stig í röð.

Fyrsti þristur Brynjars Þórs Björnssonar (í sjöttu tilraun) kom KR síðan í 67-64 þegar tæpar þrjár mínútur voru eftir. Eftir það var KR með frumkvæðið í leiknum og landaði miklum baráttusigri.

Snæfell-KR 72-76 (33-30)



Stig Snæfells: Hlynur Bæringsson 20/6 fráköst, Martins Berkis 18/5 fráköst, Sean Burton 15/6 stoðsendingar, Sigurður Á. Þorvaldsson 12/13 fráköst, Pálmi Freyr Sigurgeirsson 5, Emil Þór Jóhannsson 2.

Stig KR: Morgan Lewis 31/10 fráköst, Pavel Ermolinskij 16/10 fráköst/5 stoðsendingar, Brynjar Þór Björnsson 9, Fannar Ólafsson 8/5 fráköst, Jón Orri Kristjánsson 4, Finnur Atli Magnússon 4, Tommy Johnson 2/6 fráköst, Darri Hilmarsson 2.