Enn rýrna eignir lánafyrirtækja

Eignir ýmissa lánafyrirtækja námu 1.303 milljarða kr. í lok janúar og lækkuðu um 8,3 milljarða kr. milli mánaða.

Þetta kemur fram í hagtölum Seðlabankans. Þar segir að verðtryggð skuldabréf námu 853,6 milljarða kr. í lok mánaðarins og hækkuðu um 5,5 milljarða kr. frá fyrra mánuði.

Á einu ári hafa verðtryggð skuldabréf hækkað um 186,8 milljarða kr. eða um 28%. Eignarleigusamningar námu 134,9 milljarða kr. í lok janúar og lækkuðu um tæpa 544 milljónir kr. milli mánaða. Eigið fé hækkaði um 1,3 milljarð kr. í janúar og stóð í 66,7 milljarða kr. í lok mánaðar.

Tölur fyrir janúarmánuð eru bráðabirgðatölur og geta breyst.

Til ýmissa lánafyrirtækja teljast Íbúðalánasjóður, fjárfestingarbankar, eignarleigur, greiðslukortafyrirtæki og fjárfestingarlánasjóðir.