Eigandi Morgunblaðsins yfirheyrður vegna Glitnis-málsins

Guðbjörg Matthíasdóttir, Gunnlaugur Sævar Gunnlaugsson, Óskar Magnússon, og Katrín Pétursdóttir hafa öll verið yfirheyrð af sérstökum saksóknara í tengslum við rannsókn á Glitnis-málinu. Þau gáfu öll skýrslu sem vitni og eru ekki grunuð um refsiverða háttsemi.

Um miðjan þennan mánuð fóru fram húsleitir og skýrslutökur í tengslum við rannsóknir embættis sérstaks saksóknara á lánveitingum Glitnis banka og viðskiptum með hlutabréf.

Eitt af þeim fimm málum sem eru til rannsóknar og snerta Glitni eru kaup Glitnis á alls tæplega 40 prósenta hlut í Tryggingamiðstöðinni í september 2007 en seljandi bréfanna var Kristinn ehf. eignarhaldsfélag Guðbjargar Matthíasdóttur og fleiri félög en söluandvirðið var um 20 milljarðar króna. Eins og kom í ljós síðar var Glitnir að kaupa bréfin fyrir hönd FL Group.

Fréttastofa hefur fengið staðfest að meðal þeirra sem hafa verið yfirheyrð í tengslum við rannsóknina eru Guðbjörg Matthíasdóttir, stærsti hluthafi Árvakurs útgáfufélags Morgunblaðsins og fyrrverandi stjórnarmaður í Tryggingamiðstöðinni, Gunnlaugur Sævar Gunnlaugsson, fyrrverandi stjórnarmaður í sama fyrirtæki, Sigurbjörn Magnússon, lögmaður Guðbjargar, Óskar Magnússon, fyrrverandi forstjóri Tryggingamiðstöðvarinnar og núverandi útgefandi Morgunblaðsins og Katrín Pétursdóttir, framkvæmdastjóri Lýsis hf.

Yfirheyrð í húsakynnum ríkislögreglustjóra

Öll hafa þau fengið réttarstöðu vitnis og eru ekki grunuð um refsiverða háttsemi. Sigurbjörn Magnússon staðfesti í samtali við fréttastofu í dag að hann, Guðbjörg og Gunnlaugur Sævar hefðu öll verið yfirheyrð í húsakynnum ríkislögreglustjóra. Sagði hann að um stuttar vitnaskýrslur hefði verið að ræða og að þáttur Guðbjargar og seljendanna í þessu tilviki væri ekki til rannsóknar.

Þær upplýsingar fengust í dag hjá embætti sérstaks saksóknara að í þeim tilvikum sem vitni og sakborningar gæfu skýrslu í öðrum húsakynnum en hjá embættinu væri það vegna plássleysis. Það sama gilti um alla í þessum efnum og menn gætu ekki samið um hvar þeir gæfu skýrslu.

Fjöldinn allur af fyrrverandi starfsmönnum Glitnis hefur verið yfirheyrður. M.a Lárus Welding fyrrverandi forstjóri, Guðný Sigurðardóttir, sem var á lánasviði Glitnis og Bjarni Jóhannsson, sem var viðskiptastjóri hjá bankanum. Þá kom fram í Fréttablaðinu á laugardag að Jón Ásgeir Jóhannesson, sem var ekki í stjórn en var stærsti hluthafi bankans í gegnum FL Group, hefði komið í skýrslutöku í síðustu viku, án lögmanns.