ÍLS eykur útgáfu íbúðabréfa um 8 milljarða í ár

Endurskoðuð áætluð útgáfa íbúðabréfa Íbúðalánasjóðs (ÍLS) fyrir árið 2010 til fjármögnunar nýrra útlána er 42 - 50 milljarðar króna sem er hækkun um 8 milljarða kr. frá fyrri tölum. Hækkunin er í samræmi við fyrirhuguð kaup sjóðsins á íbúðalánasafni samanber tilkynningu til Kauphallar frá 5. mars 2010.

Þeta kemur fram í tilkynningu til Kauphallarinnar. Íbúðalánasafnið sem hér um ræðir var keypt frá Dróma (SPRON) og Frjálsa fjárfestingarbankanum.

Fram kemur ap Íbúðalánasjóður áætlar að ný útlán sjóðsins verði 25 - 33 milljarðar króna á árinu 2010, sem er lækkun um 4 milljarða kr. frá fyrri áætlun. Þar af er gert ráð fyrir að leiguíbúðalán nemi 10-12 milljörðum króna, sem er lækkun um 1 milljarð frá fyrri áætlun.

Töluverð óvissa ríkir um útlána- og útgáfuáætlanir í ljósi breyttra aðstæðna á fjármála- og fasteignamarkaði en allmikil lægð hefur verið yfir markaðinum að undanförnu. Nákvæmar tölur um áætluð útlán og útgáfu íbúðabréfa er því ekki hægt að gefa upp. Þannig geta einstöku tölur í útboðum færst á milli ársfjórðunga og veltur það á markaðsaðstæðum hverju sinni.

Íbúðalánasjóður áætlar að greiða 65-73 milljarða króna á árinu 2010 vegna fjármögnunarbréfa sinna en það er hækkun um 4 milljarða króna frá fyrri áætlun. Áætlun þessi miðast við núverandi aðstæður á fasteigna- og íbúðalánamarkaði. Verði breytingar á markaðsaðstæðum getur ofangreind áætlun breyst. Íbúðalánasjóður endurskoðar áætlanir sínar ársfjórðungslega og oftar ef þörf krefur.