Kristianstad steinlá á heimavelli á móti Linköping

Elísabet Gunnarsdóttir og stelpurnar hennar í Kristianstad mátti þola stórt tap á heimavelli á móti Linköping í sænsku kvennadeildinni í dag. Linköping vann leikinn 5-0 og komst þar með aftur upp í 3. sæti deildarinnar.

Margrét Lára Viðarsdóttir, Erla Steina Arnardóttir og Guðný Björk Óðinsdóttir voru allar í byrjunarliði Kristianstad í leiknum en Guðný var tekin útaf á 62. mínútu og Margrét Lára fór útaf á 78. mínútu. Erla Steina spilaði hinsvegar allan leikinn.

Kristianstad átti möguleika á því með sigri að tryggja sér áttunda sæti deildarinnar fyrir lokaumferðina um næstu helgi en eftir þetta tap eiga Guðbjörg Gunnarsdóttir og félagar hennar í Djurgården möguleika á að taka 8. sætið af Kristianstad-liðinu.