Meðallaun hjá félögum FVH eru 600 þúsund á mánuði

Heildarmánaðarlaun viðskiptafræðinga og hagfræðinga mælast nú 600 þúsund kr. að meðaltali sem er hækkun um tæplega 3% frá því á sama tíma í fyrra. Félag viðskiptafræðinga og hagfræðinga (FVH) hefur birt niðurstöður úr kjarakönnun félagsins fyrir árið 2010 en félagið hefur gert kjarakannanir reglulega frá árinu 1979.

Í tilkynningu segir að hækkun launa nú er talsvert minni en í síðustu mælingu þar sem laun höfðu hækkað um 8% á milli ára. Þegar niðurstöðurnar eru greindar eftir starfsaldri svarenda kemur í ljós að laun þeirra sem eru með minnstan starfsaldur hækka hlutfallslega meira en þeirra sem hafa starfað lengur sem viðskiptafræðingar eða hagfræðingar.

„Upphaflega var könnunin ávallt gerð á tveggja ára fresti en frá árinu 2007 hefur hún verið gerð árlega. Kjarakönnun FVH hefur mikla þýðingu fyrir alla viðskiptafræðinga og hagfræðinga því óhikað má segja að hún sé þeirra helsti gagnabrunnur um kjör, vinnufyrirkomulag og vinnutíma og gagnast bæði launamönnum og atvinnurekendum. Í ár byggja niðurstöðurnar á svörum 837 viðskiptafræðinga og hagfræðinga," segir í tilkynningunni.

„Athygli vekur að laun kvenna hækka í ár hlutfallslega minna en laun karla. Mánaðarlaun kvenna hækka um 1% og er miðgildi þeirra nú 550 þúsund kr. en laun karla hækka um 2% og eru nú 650 þúsund kr. á mánuði. Þegar ekki er tekið tillit til annarra þátta mælast því karlar með 18% hærri laun en konur.

Þegar launamunur kynjanna er svo leiðréttur með tilliti til fleiri þátta eins og menntunar, starfs, atvinnugreinar, aldurs, vinnuframlags, mannaforráða og starfsaldurs kemur í ljós að launamunur kynjanna heldur áfram að minnka. Nú mælist leiðréttur launamunur 3,2% en var 3,5% árið 2009."