Kaupþing auglýsir eftir fulltrúum í kröfuhafanefnd

Ætlunin er að hin nýja kröfuhafanefnd verði fullskipuð fyrir lok mánaðarins. Sú kröfuhafanefnd sem hingað til hefur starfað er óformleg en hún var sett saman í október árið 2008.

Fram kemur á heimasíðu nefndarinnar að frá því að hin óformlega kröfuhafanefnd var sett á laggirnar hafi orðið umtalsverðar breytingar á kröfuhafahóp Kaupþings. Þetta hafi komið í ljós í lok síðasta árs þegar kröfuhafalistinn var lagður fram.

Skilanefndin telur í ljósi þessara breytinga að nauðsynlegt sé að endurskipa kröfuhafanefndina. Hana munu 3-6 einstaklingar skipa, einstaklingar sem eru fulltrúar stórra kröfuhafa eða hóps kröfuhafa.