Viðskipti innlent

Enn hækka skuldabréf Landsbankans

Skuldabréf Landsbankans halda áfram að hækka og eru í dag skráð á 8,25% af nafnverði á viðskiptavefnum Keldan.is. Þau hafa því ríflega tvöfaldast í verði frá því að forseti Íslands ákvað að vísa Icesave málinu í þjóðaratkvæðagreiðslu í upphafi janúar.

Skuldabréfin hafa staðið í genginu 8% af nafnverði frá 11. febrúar s.l. og hugsanlega stendur hækkunin í dag í einhverjum tengslum við Icesave samningana sem nú standa yfir.

Verðið á skuldabréfum í föllnu íslensku bönkunum hefur verið skráð á vefsíðuna Keldan.is frá því að sú síða opnaði fyrir um fjórum mánuðum síðan. Verðið á skuldabréfum Landsbankans lá lengst í kringum 4% af nafnverði bréfanna fram að ákvörðun forsetans. Eftir ákvörðun forsetans hækkuðu bréfin strax upp í 5,5% af nafnverði eða um tæp 40%. Síðan hafa þau haldið áfram að hækka.

Á sama tíma hafa skuldabréf Straums hækkað úr genginu 25 og upp í 28 og hlutabréf Icebank (Sparisjóðabankans) hafa hækkað úr 12 og í 13.

Einas og áður hefur komið fram hér á síðunni er markaðurinn með þessi skuldabréf er óskilvirkur og ógagnsær en þeir sem kaupa Landsbankabréfin eru sennilega að veðja á að eitthvað fáist úr þrotabúi bankans umfram forgangskröfur. Verðið á bréfunum er lítt skiljanlegt í ljósi þess að margoft hefur komið fram að ekki fáist upp í forgangkröfurnar í búið.

Einnig gæti verið um að ræða kaup áhættufjárfesta sem veðja á að neyðarlögin frá haustinu 2008 muni ekki halda og þar með riðlist röð forgangskrafna í þrotabú Landsbankans.








Fleiri fréttir

Sjá meira


×