Spákaupmennska skýrir öfgafull viðbrögð við vaxtaákvörðun

Í Markaðsfréttum Íslenskra verðbréfa segir að spákaupmennska skýri þau öfgafullu viðbrögð sem skuldabréfamarkaðurinn sýndi við vaxtaákvörðun Seðlabankans í síðustu viku.

Verð skuldabréfa lækkaði mikið í síðustu viku. Verðtryggð bréf lækkuðu öll nema stystu bréfin sem hækkuðu lítillega. Mest lækkuðu lengstu bréfin, um 8,14%. Eins var með óverðtryggðu bréfin, hækkun á stysta flokknum, en lengsti flokkurinn lækkaði um 7,18%.

„Lækkunin kom að mestu leyti fram á miðvikudag, í kjölfar vaxtalækkunar Seðlabanka Íslands og ekki síst vegna orða forsvarsmanna bankans um frekara afnám gjaldeyrishafta. Spákaupmenn hafa haft mikil áhrif til hækkunar á verði bréfanna undanfarin misseri og há verðlagning ásamt skuldsettri fjármögnun skýrir eflaust stærstan hluta af þeim öfgakenndu viðbrögðum sem áttu sér stað," segir í Markaðsfréttunum.

„Markaðurinn hefur þó heldur verið að jafna sig og er verðlagning nú mun eðlilegri en fyrir þessa leiðréttingu. Lengstu flokkar óverðtryggðra bréfa hafa þó haldið áfram að lækka í verði.

Næsta skref í afnámi haftanna verður líklega að fjárfestar sem eiga löng bréf geti flutt fjármuni sína úr landi, samkvæmt því sem fram hefur komið hjá forsvarsmönnum Seðlabankans. Gangi þetta eftir setur það þrýsting á krónuna sem gæti leitt til aukinnar verðbólgu. Rökrétt er því að krafa á löngum óverðtryggðum bréfum hækki fremur en krafa á verðtryggðum."