Greining: Spáir því að verðbólgan hækki í 7,9%

Fjallað er um málið í Morgunkorni greiningarinnar. Þar segir að um nýliðin áramót hækkaði efra þrep virðisaukaskatts úr 24,5% í 25,5%, sem að öðru jöfnu veldur 0,8% hækkun á útsöluverði vara í þessu skattþrepi.

Þá hækkaði bensín- og olíugjald rétt fyrir jólin, og um áramót hækkaði áfengis- og tóbaksgjald um 10% auk þess sem nýjar álögur í formi orkuskatts á rafmagn og heitt vatn og kolefnisgjalds á eldsneyti litu þá dagsins ljós. Þessar breytingar munu að mestu leyti koma fram í verðmælingu janúarmánaðar og gerir greiningin ráð fyrir að þær vegi til u.þ.b. 1% hækkunar VNV í mánuðinum. Í febrúar má svo vænta 0,1-0,2% hækkunaráhrifa á VNV vegna þessa.

„Við gerum ráð fyrir að verðlækkun á fötum og skóm vegna útsala hafi áhrif til 0,4% lækkunar VNV í mánuðinum, og er það í takti við undanfarin ár. Auk þess munu útsölur halda aftur af verðhækkun í vöruflokkum á borð við heimilisbúnað og raftæki af ýmsu tagi," segir í Morgunkorninu.

„Þá eru vísbendingar um að húsnæðisverð lækki nú öllu hraðar en undanfarna mánuði, og gerum við ráð fyrir að lækkun reiknaðrar húsaleigu muni vega til 0,15% lækkunar VNV að þessu sinni. Hins vegar eru gjaldskrár ýmissa þjónustuaðila, sér í lagi hjá hinu opinbera, gjarnan hækkaðar á nýju ári og gerum við ráð fyrir að sú verði einnig raunin nú. Loks er enn til staðar einhver hækkunarþrýstingur vegna gengishruns krónu árið 2008, enda hefur veltuhraði ýmissa vörutegunda sem teljast til varanlegra neysluvara minnkað mikið eftir hrunið á haustdögum það ár."

Gangi spá greiningarinnar eftir mun VNV samtals hækka um 2,2% á fyrsta fjórðungi ársins. Þar af eru raunar 1,2-1,3% vegna hækkunar opinberra gjalda. Í febrúar og mars munu útsölulok þrýsta upp VNV auk þess sem áhrifa af skattahækkunum mun áfram gæta í einhverjum mæli.

„Mæld verðbólga mun því aukast jafnt og þétt og ná hámarki í 9,4% í mars samkvæmt spánni. Í kjölfarið teljum við hins vegar að draga muni úr verðbólgunni að nýju og spáum við því að hún verði 4% í lok ársins,"segir í Morgunkorninu.