Síminn telur sig ekki hafa brotið lög

Sævar Freyr Þráinsson, forstjóri Símans, segir að fyrirtækið hafi talið að þær aðgerðir þegar Síminn útbjó lista með upplýsingum um mörg þúsund viðskiptavina símafyrirtækisins Nova væru í samræmi við gildandi lög og reglur.

Samkeppniseftirlitið telur sennilegt að Síminn hafi misnotað markaðsráðandi stöðu sína á fjarskiptamarkaði og brotið samkeppnislög. Síminn útbjó lista með ítarlegum upplýsingum um mörg þúsund viðskiptavina Nova og reyndi með þær upplýsingar að vopni að ná viðskiptavinum frá Nova til sín. Þetta kemur fram í bráðabirgðaákvörðun Samkeppniseftirlitsins sem birt var í gær.

Eftirlitið telur að Síminn hafi gripið til umfangsmikilla ólögmætra aðgerða í því skyni að ná mikilvægum viðskiptavinum frá símafyrirtækinu Nova með verðlækkunum og óeðlilegri notkun á trúnaðarupplýsingum um símnotkun viðskiptavina Nova. Hafi fyrirtækið útbúið lista sem hefur að geyma sundurgreinanlegar upplýsingar um mörg þúsund viðskiptavina Nova. Umræddir listar geymi ekki aðeins upplýsingar um símanúmer og nöfn viðkomandi viðskiptavina Nova heldur líka kennitölur, heimilisföng og í mörgum tilfellum starfsheiti þeirra. Þá safnaði Síminn upplýsingum um fjölda símtala hvers og eins, lengd þeirra í mínútum eða sekúndum og lengd meðalsímtals. Á grundvelli þessara upplýsinga hafi Síminn geta beitt sér gagnvart mikilvægum viðskiptavinum Nova.

Sævar Freyr segir að Síminn hafi talið að þessar aðgerðir væru í samræmi við gildandi lög og reglur. Samkvæmt bráðabirgðaákvörðun Samkeppniseftirlitsins leiki hins vegar vafi á því hvort Símanum sé yfirhöfuð heimilt að nýta sér slíkar upplýsingar á þennan hátt. Sævar segir mikilvægt að þessi mál séu á hreinu og að Síminn muni í framhaldinu funda með Póst- og fjarskiptastofnun til þess að fá úr þessu skorið á óyggjandi hátt.

Málið er enn til rannsóknar og verður tekin lokaákvörðun þegar rannsókn lýkur.