Rannsaka meinta misnotkun MP banka

Efnahagsbrotadeild Ríkislögreglustjóra rannsakar meinta misnotkun MP banka á undanþágu á gjaldeyrishöftunum. Viðskiptin, sem áttu sér stað á fyrri helming síðasta árs, námu rúmlega 80 milljónum íslenskra króna. Bankinn neitar að hafa brotið lög.

Seðlabankinn hefur sent nokkur mál er varða grun um brot gegn gjaldeyrishaftalögunum til Fjármálaeftirlitsins sem svo hefur vísað málum til efnahagsbrotadeildar Ríkislögreglustjóra.

Eitt þeirra mála sem farið hefur þessa leið hefur nokkra sérstöðu þar sem viðskiptamaðurinn í braskinu er banki sem er starfandi hér á landi. Samkvæmt heimildum fréttastofu er bankinn sem um ræðir MP banki. Málið varðar meinta misnotkun á heimild erlendra aðila til að skipta vöxtum á skuldabréfum í erlendum gjaldeyri.

Grunur leikur á að bankinn hafi ranglega skráð skuldabréf á breskt dótturfélag sitt í því skyni að geta nýtt þessa heimild til að skipta vöxtunum á aflandsmarkaði. Viðskiptin, sem áttu sér stað á fyrri helming síðasta árs, námu um hálfri milljón evra eða rúmlega 80 milljónum íslenskra króna.

Í samtali við fréttastofu sagði Gunnar Karl Guðmundsson, forstjóri MP banka, að sér væri ekki kunnugt um að málið væri í sérstakri rannsókn. Bankinn hefði svarað fyrirspurnum um viðskiptin og fengið óháð lögfræðiálit um málið. Það staðfesti þá skoðun bankans að viðskiptin hefðu verið í samræmi við ákvæði íslenskra laga og reglna Seðlabanka Íslands. Samkvæmt heimildum fréttastofu er málið í rannsókn hjá efnahagsbrotadeild.