Hugleiða að byggja hér lyfjaverksmiðju

Bandaríska samheitalyfjafyrirtækið Alvogen leitar að stað fyrir nýja verksmiðju sem fyrirhugað er að reisa. Að sögn Róberts Wessman, starfandi stjórnarformanns Alvogen, stendur valið helst á milli Austur-Evrópu og Íslands.

Tilkynnt var um kaup fjárfestingarsjóðs undir forystu Róberts Wessman á 30 prósenta hlut í Alvogen í júlílok í fyrra og jafnframt um þá stefnu að efla starfsemi fyrirtækisins enn frekar. Róbert segir reksturinn ganga vel og að félagið sé óðum að færa út kvíarnar, en auk starfsemi í Bandaríkjunum hafi verið opnaðar starfsstöðvar í Kína, Indlandi, Búlgaríu, Rúmeníu og Serbíu. Róbert segir félagið stefna í fremstu röð samheitalyfjafyrirtækja en vöxturinn verði þó yfirvegaður og varast verði mikla skuldsetningu. Hann segir innviði félagsins sterka og á því verði byggt.

„Við stefnum á að hefja starfsemi í tíu löndum til viðbótar á þessu ári, auk þess sem við erum að skoða að bæta við verksmiðju hér á landi," segir Róbert, en hann kynnti annað verkefni til sögunnar í gær, heilbrigðisþjónustu sem starfrækt verður að Ásbrú í Reykjanesbæ.

„Verksmiðjan gæti mögulega orðið á Íslandi eða í Austur-Evrópu. Þeir staðir koma helst til greina," segir hann og bætir við að ef Ísland yrði fyrir valinu þá væru sterkar líkur á því að verksmiðjunni yrði fundinn staður á Suðurnesjum. „Við höfum átt í mjög góðu samstarfi við Reykjanesbæ," segir hann og kveðst einnig vilja leggja lóð sitt á vogarskálarnar við frekari atvinnuuppbyggingu þar, enda sé atvinnuleysi í einstökum landshlutum einna mest þar.

Samheitalyfjafyrirtækið Alvogen er með yfir 100 ára rekstrarsögu, en félagið sérhæfir sig í þróun og framleiðslu samheitalyfja sem eru flókin í þróun og framleiðslu. Róbert Wessman var áður forstjóri samheitalyfjafyrirtækisins Actavis, en lét þar af störfum í ágústbyrjun 2008. - óká