Skilanefndin orðin einn stærsti kráareigandi Bretlands

Skilanefnd Kaupþings er orðin einn stærsti kráaeigandi í Bretlandi, en fyrirtækið eignaðist öldurhúsin vegna skulda bresk-íranska viðskiptajöfursins Robert Tchenguiz við Kaupþing. Skilanefndin hefur nú kyrrsett yfir 100 milljónir punda á reikningum Tchenguiz.

Skilanefnd Kaupþings á nú rúmlega helmingshlut á móti þýska bankanum Commerzbank í breska kráarveldinu Bay Restaurant Group sem var í bresk-íranska kaupsýslumannsins Robert Tchenguiz. Undir fyrirtækinu eru keðjur eins og haha Bar og grill, La Tasca, sem eru fínni barir sem bjóða upp á ítalska rétti og Slug and Lettuce. Einn fulltrúi frá skilanefnd Kaupþings situr nú í stjórn Bay Restaurant Group. Talið er að keðjan sé rúmlega 40 milljarða króna virði.

Kaupþing banki á kröfur upp á 1,37 milljarða evra, eða tæplega 250 milljarða króna á núvirði á félög í eigu Tchenguiz. Þess má geta að þessi fjárhæð, 250 milljarðar króna, er einn sjötti af landsframleiðslu Íslands á síðasta ári. Tchenguiz var stærsti einstaki lántakandi Kaupþings og nátendur stærstu eigendum hans, en hann sat í stjórn Exista.

Nú er svo komið að bankinn hefur þegar kyrrsett yfir 100 milljónir punda í reiðufé á innstæðum bankareikninga Tchenguiz, en það eru um 20 milljarðar króna eða undir tíu prósentum af útlánum til Tchenguiz. Ekki liggur fyrir í dag hversu mikið fæst upp í kröfurnar, en ljóst er að gífurlegir fjármunir hafa glatast vegna viðskipta Tchenguiz við bankann.