Ávöxtunarkrafa á aflahlutdeild hefur minnkað verulega frá 1992

Óvissa um framtíð stjórnunar fiskveiða getur bæði haft áhrif á verð á aflamarki og aflahlutdeildum. Mikilvægt er að lágmarka þá óvissu og fastmóta stefnu til framtíðar sem ekki er hvikað frá. Þetta kemur fram í skýrslu frá Sjávarútvegs- og landbúnaðarráðuneytinu sem ber heitið Skilvirkni markaða fyrir aflaheimildir.

Aukin óvissa um framtíð fiskveiðistjórnunar síðustu ár kann að hafa dregið úr viðskiptum, sem og minna aflamark, sérstaklega í þorski. Erfið fjárhagsstaða útgerða eftir hrun hefur einnig torveldað viðskipti, segir í skýrslunni. Viðskiptin séu eigi að síður lífleg.

Viðskiptum hefur fækkað í takt við fækkandi útgerðir, en þau hafa eigi að síður verið mikil. Enda þótt dregið hafi úr viðskiptum með aflahlutdeildir í aflamarkskerfinu hin síðari ár – og þá sérstaklega eftir hrunið haustið 2008 – eru viðskipti með aflamark lífleg. Undanfarin ár hafa viðskipti á hverju fiskveiðiári svarað til 35-40% af úthlutuðu aflamarki hvers árs.

Svo virðist sem sú ávöxtunarkrafa sem handhafar aflahlutdeilda gera hafi minnkað verulega frá 1992. Þá var hún ríflega 20% en fór hæst í 33% árið 1994. Á þessum árum var ávöxtunarkrafan mun hærri en raunvextir af skuldabréfum, en bilið þar á milli fór síðan minnkandi. Undanfarin ár hefur ávöxtunarkrafan verið minni en 10%, lítið hærri en raunvextir, en vísbendingar eru um að arðsemiskrafan hafi farið hækkandi árið 2008.

Í skýrslunni segir að þessi markaður sé skilvirkur.