Hagnaður Íslandspósts 92 milljónir í fyrra

Í tilkynningu segir að heildareignir voru 5,1 milljarðar króna í árslok 2009 og eigið fé nam 2,6 milljörðum króna. Félagið greiddi 80 milljónir króna í arð til ríkissjóðs á árinu.

Ennfremur segir að með hruni íslenskra fjármálafyrirtækja og erfiðu efnahagsumhverfi víða um heim reyndist árið 2009 íslensku atvinnulífi erfitt. Íslandspóstur fór ekki varhluta af því og var fyrri hluti ársins sérstaklega þungur undir fæti. Mikill samdráttur varð í magni bréfa og böggla þegar á 4. ársfjórðungi 2008 og hélt magnsamdráttur áfram á árinu 2009.

Tekjur Íslandspósts drógust saman um 4% milli áranna 2008 og 2009 og þótt verulegt átak hafi verið gert til hagræðingar í rekstri, þá hefur það engan veginn dugað til þess að mæta þeirri arðsemiskröfu, sem fyrirtækinu er ætlað að standa undir og nemur um 10% af eigin fé.

Í ljósi aðstæðna var nokkuð dregið úr endurbótum og framkvæmdum við starfsstöðvar Íslandspósts á árinu 2009. Engu að síður var nýtt pósthús tekið í notkun á Sauðárkróki í maímánuði og póstafgeiðslan á Akureyri var flutt í nýtt húsnæði við Strandgötu í ágústmánuði.

Íslandspóstur annast einkarétt ríkisins á póstþjónustu. Samhliða einkaréttinum hvílir sú skylda á fyrirtækinu að sjá um móttöku og dreifingu áritaðra bréfa allt að 2 kg og böggla allt að 20 kg um land allt og er tekjum af einkarétti að hluta ætlað að standa undir kostnaði við þá þjónustu þar sem kostnaður við póstmeðhöndlun er meiri en almenn burðargjöld standa undir.

Í umræðu um samkeppnisforskot Íslandspósts og meinta misnotkun fyrirtækisins á markaðsráðandi stöðu gleymist gjarnan að setja þessi réttindi og skyldur í samhengi. Auk alþjónustuskyldunnar ber Íslandspósti að þróa þjónustu fyrirtækisins í takt við tækni-, hagfræði- og félagslegt umhverfi og þarfir notenda eins og segir í 6. gr. laga um póstþjónustu nr. 19/2002.

Með almennum samdrætti í bréfanotkun, sérstakri magnminnkun vegna efnahagssamdráttar í heiminum og fyrirsjáanlegum breytingum í bréfadreifingu hér á landi við afnám einkaréttar í ársbyrjun 2011 má gera ráð fyrir verulegum samdrætti í hlutdeild Íslandspósts á markaði einkaréttarbréfa sem kallar á breytingar á dreifingu, rekstri og vöruframboði.

Stjórnendur Íslandspósts hafa unnið að undirbúningi þessara beytinga um misseraskeið og hefur þeim þegar verið og mun verða mætt með breytingum á vöruframboði og dreifingu eftir því sem tilefni verða til.