Hagar færast nær hlutabréfamarkaði

Síðasta rekstrarári Haga, móðurfélags Hagkaupa og Bónuss og á annan tug annarra verslana, lauk í febrúarlok og hófst nýtt ár í bókum félagsins á mánudag. Skráningarferli Haga á hlutabréfamarkað hófst fyrir nokkru og er fundað reglulega um málið. Þá er áreiðanleikakönnun á fyrstu metrunum.

Stefnt er á að útboðs- og skráningarlýsingu Haga, sem þarf að liggja fyrir áður en félagið er skráð á hlutabréfamarkað, verði lokið í apríl eða snemma í maí, samkvæmt heimildum Markaðarins. Gefið hefur verið út að horft sé til skráningar á seinni hluta ársins.

Í skráningarlýsingu fyrirtækja fyrir útboð eru endurskoðaðar sögulegar fjárhagsupplýsingar síðustu þriggja ára. Þar má jafnframt finna ýmsar aðrar fjárhagsupplýsingar um fyrirtækið, yfirlit um sögu þess, framtíðarhorfur og lýsingu á tengdum aðilum. - jab