Rekstrarlausnir Skýrr sameinast EJS

EJS og rekstrarlausnir Skýrr hafa verið sameinuð undir nafni EJS, sem verður eftirleiðis rekið sem eitt af þremur tekjusviðum Skýrr. Sameiningin var tilkynnt starfsfólki í dag. Starfsfólk sameinaðs fyrirtækis Skýrr og EJS er um 470 talsins, eftir því sem fram kemur í tilkynningu frá fyrirtækinu.

„Með ákvörðuninni um sameiningu EJS og rekstrarlausna Skýrr í eitt svið innan Skýrr er verið að blása til sóknar og er hún tekin að vel athuguðu máli. Nú stefnum við saman besta fagfólki landsins í þekkingariðnaði á einn vinnustað þar sem mannauðurinn er helsta auðlindin. Starfsfólk EJS verður um 190 talsins og myndar núna stærstu einingu landsins í rekstri, þjónustu og sölu á rekstrarlausnum og vélbúnaði," segir Gestur G. Gestsson, forstjóri Skýrr.

Sameinað fyrirtæki þjónustar þúsundir viðskiptavini á fyrirtækjamarkaði af öllum stærðum og gerðum. Jafnframt eru tugþúsundir einstaklinga á neytendamarkaði að nota hinn vinsæla vélbúnað, sem EJS selur og þjónustar - meðal annars Dell, EMC, Oracle, TrendMicro, Microsoft og Cisco. EJS er með höfuðstöðvar við Grensásveg í Reykjavík og rekur tvær verslanir, þar og á Akureyri.