Icelandic Group skráð á markað hérlendis og erlendis

Ætlunin er að skrá félagið Icelandic group á hlutabréfamarkað. Í tilkynningu um málið á vefsíðu Vestia segir að Framtakssjóðurinn mun beita sér fyrir skráninguni á næstu 18 til 24 mánuðum háð markaðsaðstæðum.

"Í ljósi víðtækrar alþjóðlegrar starfsemi Icelandic Group og áhuga alþjóðlegra fjárfesta á félaginu, verða kannaðir kostir tvöfaldrar kauphallarskráningar, það er, að hlutabréf félagsins verði skráð í tveimur kauphöllum, bæði hér og erlendis," segir á vefsíðunni.

"Til að breikka hluthafahópinn gerir Framtakssjóðurinn ráð fyrir að bjóða öðrum langtíma fjárfestum að kaupa allt að 35% hlut í félaginu á næstu mánuðum. Að mati Framtakssjóðsins mun samstarf við langtíma fagfjárfesta með áhuga og áherslu á sjávarafurðir auðvelda kauphallarskráningu félagsins og skapa því tryggari framtíð."

Icelandic Group hét áður Sölumiðstöð hraðfrystihúsanna og var meðal eigna Björgólfs Guðmundssonar þar til eftir hrunið haustið 2008 er félagið komst í eigu Landsbankans. Það var síðan selt Framtakssjóðnum nýlega.

Hagnaður Icelandic Group af reglulegri starfsemi fyrir skatta var rúmir 2 milljarðar króna á fyrri hluta þessa árs. Rekstrarhagnaður jókst um 20 prósent og var 4,1 milljarður kr.

Hagnaður fyrir skatta jókst um 135 prósent milli ára þrátt fyrir að árið 2009 hefði verið besta ár í sögu félagsins. Icelandic Group er alþjóðlegt sjávarútvegsfyrirtæki og eitt það stærsta sinnar tegundar í heiminum. Stór hluti íslenskra sjávarafurða er seldur af Icelandic.