Kaupþing eignast skuldabréf frá Lehman Brothers

Fjallað er um málið í uppfærðri skýrslu skilanefndarinnar til kröfuhafa bankans. Þar er greint frá forsögu málsins, sem rakin hefur verið hér á visir.is. Árið 2007 veitt Kaupþing í Svíþjóð lán til 3.200 Svía til kaupa á fyrrgreindum skuldabréfum og fór viðskiptin fram í gegnum Acta. Lánin voru flutt yfir til Kaupþings þegar starfsemi bankans í Svíþjóð var seld Ålandsbankanum.

Í febrúar s.l. gerði Kaupþing svo samning við Acta um að Svíarnir sem keyptu bréfin myndu endurgreiða 60% af nafnverði þeirra og á sama tíma voru skuldabréfin í Lehman Brothers færð yfir til Kaupþings.

Í frétt á visir.is frá 10. mars s.l. segir að skilanefnd Kaupþings mun á næstunni fá greiddar 600 milljónir sænskra kr. eða tæplega 11 milljarða kr. Um 80% viðskiptavina Acta Kapitalforvalting hafa fallist á tilboð Kaupþings um endurgreiðslur lána vegna kaupa á skuldabréfum í Lehman Brothers.

Kaupþing gerði þessum viðskiptavinum tilboð fyrr í vetur um 40% afslátt af lánum þeirra gegn því skilyrði að þeir myndu ekki lögsækja bankann eða Acta. Þeir sem tekið hafa tilboðinu skulduðu samtals milljarð sænskra kr. hjá Kaupþingi sem fær nú 600 milljónir sænskra kr. endurgreiddar.

Ekki er vitað hve mikið fæst upp í nafnverð þessara skuldabréfa Lehmans Brothers en á uppboði sem haldið var skömmu eftir gjaldþrot bankans haustið 2008 voru þau seld á 10% af nafnverði.