Goldman Sachs ákærður fyrir fjársvik, hlutabréf hrapa

Samkvæmt frétt á börsen.dk gengur ákæra SEC út á að Goldman Sachs hafi meðvitað blekkt viðskiptavini sína í viðskiptum með skuldabréfavafning sem tengdur var svokölluðum undirmálslánum á fasteignamarkaðinum í Bandaríkjunum árið 2007. Viðskiptavinir bankans töpuðu um 5 milljörðum dollara eða yfir 630 milljörðum kr.

SEC segir að Goldman Sachs hafi meðvitað leyft einum af stærstu vogunarsjóðum heimsins, Paulson & Co., að hafa áhrif á samsetningu á skuldabréfavafningnum á sama tíma og Paulson veðjaði síðan á að vafningurinn myndi falla í verði.

Vafningurinn sem hér um ræðir bar heitið Abacus 2007-AC1 og var boðinn öðrum fjárfestum til sölu án þess að geta um aðkomu þriðja aðila að honum. Þar með vissi enginn að þeir sem stóðu að baki gerningnum myndu hagnast mest á honum í samdrætti á markaðinum.

Sölunni á Abacus 2007-AC1 lauk þann 26. apríl og í framhaldinu greiddi Paulson 15 milljónir dollara til Goldman Sachs fyrir að hafa staðið fyrir sölunni. Sex mánuðum síðar höfðu 83% af undirmálslánunum í vafningnum tapað verðgildi sínu.