Rúm 4.200 tonn veidd umfram kvóta á fiskveiðiárinu

Á síðasta fiskveiðiári, sem lauk um mánaðarmótin, voru 4.212 tonn veidd umfram úthlutaðan kvóta. Þetta kemur fram á vefsíðu Fiskistofu. Þessum afla var landað en verðmæti hans fer að mestu í Verkefnasjóð sjávarútvegsins. Reikna má með að aflaverðmæti þessa utankvótafisks nemi yfir milljarði kr.

Á vefsíðunni segir að á síðasta fiskveiðiári hafi 4.212 tonn af heildarafla íslensk veiðiskipa runnið til Verkefnasjóðs sjávarútvegsins (vs-afli) samanborið við 4.267 tonn á fiskveiðiárinu 2008/2009. Þorskaflinn sem rann í verkefnasjóðinn var 3.394 tonn en var 3.877 tonn á fiskveiðiárinu 2008/2009.

Skiptin vs-afla er þannig að 80% hans renna í Verkefnasjóðinn en 20% til þeirrar útgerðar sem landar honum. Sjóðurinn styrkir síðan ýmis verkefni hjá Hafrannsókn og fleiri aðilum. Aflaverðmætið er fundið út með því að nota stuðulinn 300 kr. fyrir kg en þorskkílóið á markaði var rúmlega 300 kr. á þessu ári.

Þá kemur fram að minni afli var skráður sem undirmálsafli og reiknaður til kvóta með ívilnandi hætti en á fiskveiðiárinu 2008/2009 eða 2.414 tonn samanborið við 2.969 tonn. Þarna er um 20% minnkun að ræða á lönduðum undirmálsfiski.

Annar afli sem hefur ekki reiknast til kvóta er 8.079 tonn en mestur hluti hans fékkst við veiðar strandveiðibáta í sumar.