Greining Arion: Vaxtalækkun upp á eitt prósentustig

Það er mat greiningar Arion banka að Peningastefnunefnd Seðlabankans muni lækka stýrivexti um 100 punkta (eitt prósentustig) á fundi sínum á morgun. Enda eru verðbólguhorfur hagfelldar, krónan hefur haldið áfram að styrkjast og skuldatryggingaálag á íslenska ríkið hefur lækkað.

Fjallað er um málið í Markaðspunktum greiningarinnar. Þar segir að þessu til viðbótar reyndust landsframleiðslutölur á 2. ársfjórðungi lakari en vænst var til. Einnig er útlit fyrir að bankakerfið standi traustari fótum eftir úrskurð Hæstarréttar um gengistryggð lán heimilanna.

„Óvissa um áhrif gengislána á bankakerfið hefur undanfarið verið meðal þeirra atriða sem hafa sett nefndinni skorður. Greiningardeild telur að Seðlabankinn haldi sig því við 100 punkta vaxtalækkun á næsta vaxtaákvörðunarfundi þann 22.september nk. Gangi spá okkar eftir fara innlánsvextir (depo) niður í 4,5% og veðlánavextir (repo) 6%," segir í Markaðspunktunum .

„Þó er Seðlabankinn á ákveðnum krossgötum í augnablikinu þar sem tvö af helstu skilyrðunum sem Seðlabankinn hefur sett fyrir því að afnám hafta geti hafist virðast vera að þokast í rétta átt."

Síðan segir að í fyrsta lagi hefur dregið verulega úr óvissu um áhrif gengislánadómsins á bankana. Í öðru lagi virðist þriðja endurskoðun AGS vera handan við hornið ef marka má fréttir og ummæli AGS. Peningastefnunefndin hefur lagt ríka áherslu á að fyrstu skref í afnámi gjaldeyrishafta haldist í hendur við þriðju endurskoðun AGS.

Í þriðja lagi mun sala á FIH Erhvervsbank efla gjaldeyrisforðann um 39 milljarða króna (að því gefnu að allt staðgreiðslufé gangi til Seðlabankans). Seðlabankinn átti veð í 99,89% hlut í bankanum, samtals 500 milljónir evra (um 76 milljarðar króna í dag). Mun gjaldeyrisforðinn í dag því nálgast 590 milljarða króna þegar viðskiptin hafa gengið í gegn.

„Ætli Seðlabankinn sér að stíga einhver skref í afnámi haftanna gæti það leitt til hægari vaxtalækkana en ella. Ekki er því hægt að útiloka að bjartsýnustu vaxtalækkunarsinnar verði fyrir vonbrigðum með yfirlýsingu Peningastefnunefndar á fundinum næstkomandi miðvikudag," segir í Markaðspunktnum.

„Við teljum að þróun stýrivaxta það sem eftir lifir árs muni að töluverðu leyti velta á því hvaða afstöðu bankinn mun taka til afnáms hafta. Ekki er hægt að útiloka að Seðlabankinn haldi sínum kúrsi út árið og lækki vexti áfram um 100 punkta á hverjum fundi eða samtals 300 punkta. Á hinn bóginn er hugsanlegt að meginstefið í yfirlýsingum Seðlabankans verði að afnám hafta sé á næsta leiti, og vextir lækki því aðeins um 150 punkta til ársloka.

Við teljum líklegustu niðurstöðuna hinsvegar liggja einhverstaðar þarna á milli og að vextir verði lækkaðir um 200-250 punkta (2 til 2,5 prósentustig) til ársloka."

Við þetta má svo bæta að spá greiningarinnar er í takt við það sem aðrar greiningar hafa spáð um ákvörðun Peningastefnunefndar á morgun.