Vopna- og olíusölumilljarðar streyma gegnum Danmörku

Flóknar skattareglur gera það að verkum að það er ódýrara fyrir félag á Nýja Sjálandi að eiga fyrirtæki í Kanada ef fjárstreymið liggur í gegnum eignarhaldsfélag í Danmörku. Milljarðar danskra kr. m.a. frá vopna- og olíusölu streyma gegnum Danmörku þegar alþjóðleg stórfyrirtæki fjárfesta um allan heim.

Þannig hefst frétt í Jyllands Posten um svokölluð gegnumstreymisfélög í Danmörku sem dönsk skattayfirvöld hafa nú til rannsóknar.

Skatturinn er að kanna hvort skattsvik séu stunduð í Danmörku eða öðrum löndum þegar miklar fjárhæðir streyma í gegnum félög sem hafa ekki annan tilgang en þann að stjórna flæðinu.

Jyllands Posten segir að talsmenn Bech-Bruun, stærstu lögmannsstofu Danmerkur, viðurkenni að þessir fjármagnsflutningar séu oft eingöngu til að losna við skattgreiðslur. Félögin sem standi á bakvið þetta séu að nýta sér mismun á milli landa hvað varðar skatta af arðgreiðslum og vaxtatekjum. Þessir skattar eru hagstæðir í Danmörku. Bech-Bruun er ráðgjafi fyrir fjölmörg alþjóðleg fyrirtæki sem vilja stofna eignarhaldsfélög í Danmörku.

Skattasérfræðingurinn Christen Amby segir að þetta sé vandamál þar sem núverandi kerfi geri það að verkum að Danir séu að grafa undan skattareglum í öðrum löndum.

Í fréttinni er tekið sem dæmi að vopnaframleiðandinn Northrop Grumman eigi eignarhaldsfélag með heimilisfangi á skrifstofu Bech Bruun en þetta félag á svo aftur 11 fyrirtæki víða í Evrópu.