Tölvur og sjónvörp hafa lækkað í verði

Á sama tíma og tóbak hefur margfaldast í verði á síðustu árum eru tölvur og sjónvörp ódýrari í dag en fyrir áratug. Vísitala neysluverðs sem mælir verðbólgu hefur hækkað um 3,3% síðastliðna tólf mánuði. Undanfarna þrjá mánuði hefur vísitalan hækkað um 1% sem jafngildir 4% verðbólgu á ári.

Athyglisvert er að skoða vísitöluna lengra aftur í tímann. Þannig hefur vístalan hækkað um rúm 100% á síðustu 13 árum. En vörur hafa hækkað mismikið í verði á þessum tíma. Þannig hafa matur og drykkjarvörur hækkað minna en vísitalan. Fiskur hefur hækkað meira í verði en mjólk, kaffi og sælgæti.

Þá hafa föt og skór hækkað minna en til dæmis húsaleiga. Tóbak og áfengi hafa hækkað mikið í verði og hefur verð á tóbaki þrefaldast á síðustu 13 árum. Sjónvörp, myndbönd og tölvur eru hins vegar talsvert ódýrari í dag en árið 1997.