Aalborg Portland í Danmörku fékk ólöglegan ríkisstyrk

26. maí 2010 08:42

Frumvarpið þýddi í raun að Aalborg Portland, sem er eini sementsframleiðandi Danmerkur, gat sparað sér 10 milljónir danskra kr. á ári fram til ársins 2020.

Framkvæmdastjórn ESB metur það svo að tveggja ára gömul löggjöf sé í raun ólöglegur ríkisstyrkur til sementframleiðandans Aalborg Portland í Danmörku. Aalborg Portland muni hagnast um 100 milljónir danskra kr. eða tæpa 2,2 milljarða kr. þar sem löggjöfin losaði fyrirtækið undan greiðslum á mengunargjöldum.

Greint er frá málinu í Politiken í dag en Aalborg Portland er móðurfélag Aalborg Portland Íslandi ehf. Í Politiken er haft eftir Joaquin Almuniao samkeppnisstjóra framkvæmdastjórnarinnar að litið sé á afnám mengunargjaldanna sem ríkisstyrk af hálfu danskra stjórnvalda. Slíkir styrkir eru ólöglegir samkvæmt lögum og reglum ESB.

Rannsókn framkvæmdastjórarinnar á málinu lauk í gær með fyrrgreindri niðurstöðu. Í Politiken segir að niðurstaðan sé sjaldgæfur skellur fyrir danska stjórnsýslu sem ekki er þekkt fyrir að brjóta gegn lögum og reglum ESB. Niðurstaða framkvæmdastjórnarinnar þýði að dönsk stjórnvöld verða strax að stoppa hinn ólöglega ríkisstyrk.

Upphaf málsins er að árið 2008 var samþykkt frumvarp á danska þinginu sem fól í sér að sementsryk yrði undanþegið frá mengunargjöldum atvinnulífsins. Allir flokkar á danska þinginu samþykktu þetta frumvarp að Enhedslisten undanskildum. Frumvarpið þýddi í raun að Aalborg Portland, sem er eini sementsframleiðandi Danmerkur, gat sparað sér 10 milljónir danskra kr. á ári fram til ársins 2020.

Það var þáverandi skattamálaráðherra Danmerkur, Kristian Jensen, sem lagði frumvarpið fram en hann segir að frumvarpið hafi verið hugsað sem skaðabætur fyrir Aalborg Portland þar sem fyrirtækið hafi tekið á sig háár greiðslur vegna annarra grænna skatta og gjalda.