Ísland með afgerandi forystu í jarðhitanýtingu

Ný skoðanakönnun sem Capacent framkvæmdi í 35 löndum að frumkvæði Íslandsbanka sýnir að Ísland nýtur mikillar virðingar og trausts þegar kemur að jarðhitanýtingu.

Könnunin var framkvæmd dagana 22. september til 4. október og var úrtakið samsett af áskrifendum að vefsíðunni ThinkGeoEnergy.com, sem er alþjóðleg vefsíða fyrir fagfólk um jarðhitamál, og viðskiptavinum Íslandsbanka á jarðhitasviði víða um heim.

Í tilkynningu segir að alls var úrtakið 935 aðilar. Svarhlutfall var 27,9% sem þykir ásættanlegt og vel marktækt þegar kemur að könnunum á sérhæfðum mörkuðum að sögn sérfræðinga Capacent sem unnu könnunina. Þegar spurt var; „Hvaða land kemur fyrst upp í hugann þegar þú hugsar um jarðhitaorku?" kom sérstaða og forysta Íslands á þessu sviði berlega í ljós. Niðurstöðurnar voru þessar:

Ísland............. 53,3%

Bandaríkin...... 25,2%

Indónesía......... 5,4%

Nýja Sjáland..... 5,0%

Ítalía................. 4,1%

Öll önnur lönd... 7,0%

Ísland er einnig með afgerandi forystu þegar þátttakendur voru beðnir um að meta hvaða land væri fremst á sviði fræðslu, háskólamenntunar og þjálfunar í tengslum við jarðhitanýtingu. Þar fékk Ísland rúmlega 55% allra svara.

„Niðurstöður könnunar gefa ágæta vísbendingu um að Íslendingar eru hátt metnir á heimsvísu á sviði jarðhita og að mikill árangur hefur náðst. Það er hins vegar ljóst þessi forysta helst ekki nema því aðeins að þróun jarðhitanýtingar haldi áfram hér á landi," segir Árni Magnússon, forstöðumaður Orkuteymis Íslandsbanka.

Það er því mikilvægt að hlúa að þessari þekkingu en um leið efla útflutning á þekkingu á þessu sviði í gegnum ráðgjafastarfsemi erlendis. Við höfum þegar séð íslensk verkfræðifyrirtæki gera góða hluti hvað það varðar."

Niðurstöður könnunarinnar voru birtar á Alþjóðlegri jarðhitaráðstefnu í Sacramento í Bandaríkjunum í vikunni auk nýrrar skýrslu Íslandsbanka um bandaríska jarðhitamarkaðinn.

Mánudaginn 1. nóvember nk. fer fram ráðstefna um klasamyndun í íslenskum jarðhitaiðnaði þar sem Harvard prófessorinn Michel Porter er meðal ræðumanna og er Íslandsbanki í hópi bakhjarla ráðstefnunnar.