Stjórnarformaður Nýherja með rúmar 2,5 milljónir í laun

Í tilkynningu segir að samþykkt var að eftirtaldir skipi stjórn fyrir næsta starfsár: Benedikt Jóhannesson, Árni Vilhjálmsson og Guðmundur Jóh. Jónsson. Samþykkt var að varamaður verði Jafet S. Ólafsson.

Ný stjórn skipti með sér verkum á stjórnarfundi, sem haldinn var í framhaldi aðalfundar. Benedikt Jóhannesson gegnir stöðu stjórnarformanns. Árni Vilhjálmsson var kjörinn varaformaður.

Samþykkt var tillaga stjórnar að ekki verði greiddur arður vegna rekstrarársins 2009.

Samþykkt var eftirfarandi breyting á grein 2.1. samþykkta félagins. Í lok greinarinnar komi svohljóðandi bráðabirgðaákvæði:

Stjórn félagsins er heimilt sbr. 41. gr. hlutafélagalaga, að auka hlutafé félagsins um allt að kr. 120 millj. með sölu nýrra hluta. Falla núverandi hluthafar frá forkaupsrétti sínum til kaupa á hlutum þessum. Stjórn félagsins ákveður útboðsgengi bréfanna og sölureglur hverju sinni. Skal áskrift fara fram samkvæmt ákvæðum samþykkta félagsins og V. Kafla hlutafélagalaga. Engar hömlur skulu vera á viðskiptum með hina nýju hluti.

Hinir nýju hlutir skulu veita réttindi í félaginu frá skráningardegi hlutafjárhækkunarinnar. Heimild þessa getur stjórn Nýherja nýtt innan þriggja ára frá samþykkt hennar.