Button vill verja meistaratitilinn

Jenson Button er sérlega ánægður að hafa landað sigri í öðru móti sínu með McLaren, þar sem hann telur að önnur lið séu í raun með fljótari bíla en hans lið. Button varð meistari í fyrra með Brawn, sem nú heitir Mercedes. Á þeim bæ aka núna Michael Schumacher og Nico Rosberg, en Button ekur með Lewis Hamilton. Hann er í þriðja sæti í stigakeppni ökumanna með 31 stig, Felipe Massa er með 33 og Fernando Alonso 37 en þeir aka báðir Ferrari. „Aðeins 30% af þeim sem hafa orðið meistarar verja titilinn og það er aldrei auðvelt. Sérstaklega ekki gegn úrvali ökumanna sem nú eru að keppa. Við vildum allir vinna fyrsta mótið, því það hefur oft hent að sá sem vinnur fyrsta mótið verður meistari", sagði Button í spjalli á vefsvæði Autosport, en Fernando Alonso vann fyrsta mótið með Ferrrari. „Við erum ekki með mesta hraðann, ef við getum náð úrslitum eins og í Ástralíu, þá er það stórkostlegt. Það væri afrek að vinna annan titil í röð með nýju liði, en slíkt er ekki hægt að bóka strax. Næsta mót verður ekki auðvelt, það er mikið eftir, en vonandi hefur þessi sigur elft okkur sem lið." „Við erum ekki með fljótasta bílinn, en náðum í stigin. Vettel er með fljótasta bílinn, en gat ekki nýtt sér það. Vonandi verðum við brátt jafnfljótir eða fljótari. Við bætum bílinn fyrir næsta mót og hægt er að taka framúr á þeirri braut. Þegar bíll Vettls verður áreiðanlegur, þá verða hann erfiður viðureignar", sagði Button, en Vettel náði forystu í tveimur fyrstu mótunum, en bíll hans bilaði í báðum mótum sem kostaði hann sigra. Button keppir næst í Malasíu um páskahelgina á Sepang brautinni.