Eignir Landic Property gætu endað á nauðungaruppboði

Fasteignir sem metnar eru á einn milljarð danskra króna eða rúmlega 20 milljörðum kr. og eru í eigu þrotabús Landic Property í Danmörku gætu lent á nauðungaruppboði. Fari svo munu þær hrapa í verði.

Um er að ræða svokallaðar SAS-fasteignir á Amager en þær hýstu áður höfuðstöðvar flugfélagsins. SAS leigir þær enn undir ýmsa starfsemi. Landic Property í Danmörku var áður í eigu Baugs.

Það er félagið Landic Property Bonds I sem heldur formlega á þessum eignum en þær hafa verið auglýstar til sölu. Einn af kröfuhöfunum vill nú fara í fullnustuaðgerð vegna 30 milljón danskra kr. skuldar sem Landic átti að borga honum í janúar á síðasta ári. Verði það úr mun þýskur banki að öllum líkindum gjaldfella kröfu sína í SAS-fasteignirnar upp á 530 milljónir danskra kr.

Í umfjöllun um málið á business.dk segir að Ole Vagner sem upphaflega stofnaði Landic Property 2003, þá undir nafninu Keops, sé æfur vegna þess að 30 milljóna danskra kr. skuldin var ekki greidd á sínum tíma. Lausafé hefði verið til staðar, að hans sögn.

Vagner á enn lítinn hlut í SAS-fasteignunum og vill raunar kaupa þær aftur að fullu. Um var að ræða fyrsta fasteignaverkefni Vagners eftir að hann stofnaði Keops.

SAS-fasteignirnar voru fjármagnaðar með útgáfu skuldabréfa til fjárfesta með veð í eignunum. Þeir sem halda nú á þessum skuldabréfum hafa verið boðaðir á fund þann 14. desember n.k. þar sem framtíð þessara eigna verður ákveðin.