Kaupmáttarskerðingin á sér fá fordæmi hérlendis

Sú kaupmáttarskerðing sem íslenskir launþegar hafa orðið fyrir undanfarin misseri á sér fá fordæmi hér á landi og þarf að fara aftur til byrjun tíunda áratugar síðustu aldar til þess að finna álíka þróun.

Þetta kemur fram í Morgunkorni greiningar Íslandsbanka. Þar segir að jafnframt hefur kaupmáttur launa ekki rýrnað jafn mikið á einu ári og 2009 í a.m.k. tvo áratugi, eða eins langt og tölur Hagstofunnar ná. Þessi mikla kaupmáttarrýrnun hefur því leitt til þess að kaupmáttur er kominn aftur til ársins 2002.

Telja má líklegt að kaupmáttur komi til með að skerðast enn frekar á næstunni enda nokkuð ljóst m.v. ástandið á vinnumarkaði að samningsstaða flestra launþega er nokkuð veik. Á sama tíma mun verðbólgan verða áfram talsverð á næstu mánuðum. Samkvæmt nýlegri spá okkar mun mæld verðbólga aukast jafnt og þétt næsta kastið og ná hámarki í 9,4% í mars, en í kjölfarið teljum við hins vegar að draga muni úr verðbólgunni að nýju.