Íslendingar í viðræðum við Rússa um stórt orkuver

Íslendingar og Rússar eiga nú í viðræðum um jarðvarmaorkuver á Kamstjaka í austasta hluta Rússlands. Þetta kom fram í máli Sergei Shmatko orkumálaráðherra Rússlands á ríkisstjórnarfundi þar í landi í gærdag.

Fréttastofan RIA Novosti hefur eftir ráðherranum að viðræðurnar snúist um stórt orkuver ásamt byggingu orkufrekrar stóriðju á Kamstjaka svæðinu.

„Við höfum mikinn áhuga á þessu," segir Shmatko. „Ísland er mjög uppbyggilegt og telur að samvinna við Rússland sé eitt af forgangsmálum sínum. Þess vega erum við mjög vongóðir."

Þá greinir Shmatko frá nýlegri heimsókn sinni til Íslands þar sem hann skoðaði stór jarðvarmaorkuver og bendir á að Íslendingar séu sjálfum sér nægir með orku frá endurnýjanlegum orkugjöfum.

Rússland ætlar að ná því fyrir árið 2020 að um 4,5% af heildarorkunotkun þeirra komi fram endurnýjanlegum orkugjöfum.