Kortanotkun bendir til að jafnvægi sé að nást í einkaneyslu

Greining Íslandsbanka fjallar um málið í Morgunkorni sínu og rýnir í tölur um greiðslumiðlun sem Seðlabankinn birti í gær, Samkvæmt þeim nam kreditkortavelta landsmanna í febrúarmánuði 24,5 milljörðum kr. sem er í krónum talið um það bil 2 milljörðum kr. meiri velta en í sama mánuði í fyrra.

Þegar leiðrétt hefur verið fyrir þróun verðlags og gengis er ljóst að velta á kreditkortum var 1,4% meiri að raungildi í febrúar borið saman við febrúar 2009. Þetta er þriðja mánuðinn í röð sem að heildarkreditkortavelta landans eykst að raunvirði frá sama mánuði árið á undan.

Þessi viðsnúningur er ekki síst tilkominn vegna aukinnar notkunar landsmanna á kreditkortum erlendis sem hrundi með bönkunum haustið 2008 samhliða því sem utanlandsferðir Íslendinga drógust saman um allt að þriðjung.

Núna sýna tölur Ferðamálastofu hinsvegar að Íslendingar láta í auknum mæli undan útþrá sinni og þessar tölur endurspegla það. Þessi viðsnúningur í þróun kreditkortaveltu gefur vísbendingu um að byrjað sé að vinda ofan af þeim samfellda samdrætti sem varað hefur yfir í kreditkortaveltu allt frá síðsumri 2008.

Kortavelta gefur góða vísbendingu um þróun einkaneyslu. Sé kortavelta að ná jafnvægi gæti það því gefið vísbendingu um að einkaneysla byrji senn að taka við sér eftir gríðarlegan samdrátt síðustu missera, að því er segir í Morgunkorninu.