Tækifæri til að lækka lán heimila og fyrirtækja

Rekstrarniðurstaða Landsbankans á fyrsta ársfjórðungi bendir til þess að það muni verða meira svigrúm til að lækka höfuðstól lána en hingað til, segir Lilja Mósesdóttir, formaður viðskiptanefndar Alþingis og þingmaður VG.

Hagnaðurinn á fyrstu þremur mánuðum nam 8,3 milljörðum íslenskra króna og var arðsemi eiginfjár 21%. Lilja setur þann fyrirvara við þessar tölur að bankinn hafi ekkert verið byrjaður að afskrifa hjá fyrirtækjum á fyrstu þremur mánuðunum en það sé komið á skrið núna.

„Það er verulegt svigrúm til að afskrifa hluta af skuldum fyrirtækja og heimila sem er brýnt að nýta til að koma hér af stað aukinni neyslu," segir Lilja. Hún segir að með því myndi eftirspurn eftir vöru og þjónustu aukast sem myndi síðan auka atvinnustigið.