Óheimilt að greiða þóknanir

Óheimilt er að ráðstafa iðgjöldum þeirra viðskiptavina sem eru með viðbótarlífeyrissparnað með öðrum hætti en í beinan sparnað, samkvæmt fjármálaráðuneytinu. Þeim aðilum sem haga samningum sínum svo, eins og Arion banka og KB ráðgjöf, hefur verið gerð grein fyrir því, samkvæmt upplýsingum frá ráðuneytinu.

Fjármálaráðuneytið hefur á árinu hafnað beiðnum um staðfestingu á reglum lífeyrissjóða þar sem kveðið er á um aðra ráðstöfun iðgjalda en heimil er samkvæmt lögum. „Iðgjaldi eða iðgjaldshluta samkvæmt samningi um séreignarsparnað skuli einungis verja til öflunar lífeyrisréttinda. Ekki sé að finna nein frávik frá þeim lögum,“ segir í svari ráðuneytisins til Fréttablaðsins.

Arion banki ákvað að hætta að selja nýja samninga Vista í kjölfar umfjöllunar um sex greiðslur mánaðarlegra iðgjalda sem renna í þóknun til KB ráðgjafar en ekki í lífeyrissparnað viðskiptavina, sem þeir gætu átt á hættu að borga bakreikninga af. Ríkisskattstjóri sendi fjármálaráðuneytinu bréf í apríl varðandi málið, sem hefur verið til skoðunar síðan þá. Ráðuneytið hefur engum óskum eða fyrirmælum beint til ríkisskattstjóra um að iðgjöld sem ráðstafað hefur verið í þóknanir til fyrirtækja verði skoðuð. - sv