Greining: Munar 85 milljörðum á Icesave tillögum

Þetta kemur fram í Markaðspunktum greiningarinnar. Þar segir að í lok síðustu viku lak á netið skjal (http://wikileaks.org/file/icesave2.pdf) sem varpar ljósi á þau kjör sem Bretar og Hollendingar hafa boðið Íslendingum í Icesave deilunni. Í sama skjali koma jafnframt fram hugmyndir Íslendinga um lausn á deilunni.

Í tilboði Íslendinga ber ríkið enga vexti út árið 2011 en stighækkandi fastir vextir bætast við skuldina á árunum 2012-2016. Vextirnir eru 2,5% í upphafi en hækka svo um 25 punkta á ári þar til þeir fara upp í 3,5% og virðast þau viðmið vera nokkuð í takt við fjármögnunarkostnað Breta, sem hefur reyndar versnað á síðustu dögum. Einnig má benda á að í síðasta tilboði Breta og Hollendinga var boðið upp á vaxtalaust tímabil út þetta ár.

„Við miðum útreikninga við að endurheimtur í bú Landsbankans verði með svipuðum hætti og fram kemur í síðasta mati skilanefndar bankans þar sem gert er ráð fyrir að 89% fáist upp í forgangskröfur," segir í Markaðspunktunum.

„Ennfremur gerum við ráð fyrir að skuldabréf Nýja Landsbankans til þess gamla verði notað sem greiðsla upp í Icesave skuldbindinguna að fullu árið 2010 eða 2011 en með því verður vaxtakostnaður ríkisins umtalsvert lægri. Ástæða þess að við gerum það er sú að í samningsdrögum Íslendinga er gert ráð fyrir að eignir þrotabús Landsbankans hafi þegar verið nýttar upp í forgangskröfur í júní árið 2016, áður en liðið er að lokagjalddaga Landsbankaskuldabréfsins. Það hlýtur því að vera að Íslendingar ætli sér með einhverjum hætti að nota umrætt skuldabréf til að lágmarka vaxtakostnað ríkisins."