Nick Bradford mætir sínum gömlu félögum í Grindavík í kvöld

Nick Bradford og félagar í Njarðvík reyna að koma sér aftur í gang í kvöld, eftir bikarskellinn á móti Keflavík á dögunum, þegar liðið fær Grindavík í heimsókn í Ljónagryfjuna í Njarðvík í Iceland Express deild karla. Nick Bradford spilaði eins og kunnugt er með Grindavík við mjög góðan orðstír í fyrra.

Grindvíkingar eiga einnig harma að hefna, því auk þess að tapa fyrri leiknum fyrir Njarðvík á heimavelli sínum í Grindavík, tapaði liðið fyrir nýliðum Fjölnis á heimavelli í síðasta deildarleik sínum. Með sigri myndu þeir jafna toppbaráttuna enn frekar enda þá "aðeins" fjórum stigum á eftir Njarðvík.

Tveir aðrir leikir fara einnig fram í Iceland Express deildinni í kvöld þegar KR tekur á móti Tindastól í DHL-Höllinni og tvö neðstu liðin, Breiðablik og FSu, mætast í Smáranum í Kópavogi. Allir leikir kvöldsins hefjast klukkan 19.15.