Már útilokar ekki evruna þrátt fyrir vandræði

Már Guðmundsson seðlabankastjóri telur að það geti verið góður valmöguleiki fyrir Ísland að taka upp evru, þrátt fyrir skuldavandann. Már Guðmundsson, segir að skuldavandi evruríkja, sé ekki tilkominn vegna sameiginlegu myntarinnar heldur vegna skorts á eftirliti í bankakerfinu.

Í frétt á vef BBC er fjallað um það að Íslendingar hafi sótt um aðild að Evrópusambandinu. Már segir í samtali við BBC að hann telji að Íslendingar geti spjarað sig bæði innan og utan evrusvæðisins.

Miklar vangaveltur hafa verið um framtíð evrunnar vegna þeirra vandræða sem Grikkland og Írland, sem bæði eiga aðild að myntsamstarfi Evrópu, hafa ratað í að undanförnu.